Exo 2 | NdeIBE | STEP | Kwathi indoda yasendlini yakoLevi yathatha indodakazi yesizwe sakoLevi:

Exodus 2

Ukuzalwa kukaMosi

1 Kwathi indoda yasendlini yakoLevi yathatha indodakazi yesizwe sakoLevi: 2 wathatha isisu owesifazana lo wazala indodana. Wabona ukuthi umntwana wayemuhle kakhulu, wasemfihla okwezinyanga ezintathu.

3 Kodwa kwathi lapho sekusehlula ukuthi amfihle, wazuza isitsha semizi wasibhada ngodaka lengcino. Wafaka umntwana phakathi kwaso wayasibeka okhunjini lomfula uNayili phakathi kwemihlanga. 4 Udadewabo wema bucwala ukuba abone okwenzakala kuye.

5 Indodakazi kaFaro yehlela emfuleni ukuyageza, amantombazana ayikhangelayo ayehamba ekhunjini lomfula. Yasisibona isitsha phakathi kwemihlanga yathuma incekukazi yayo ukuyasithatha. 6 Yasivula yambona umntwana. Wayekhala, yasimzwela usizi yathi, “Lo ngomunye wabantwana bamaHebheru.”

7 Udadewabo wasesithi endodakazini kaFaro, “Ngingayakudingela omunye wabesifazana bamaHebheru ukuthi akondlele umntwana na?”

8 Yasisithi, “Yebo, hamba.” Intombazana yasuka yayabiza unina womntwana.

9 Indodakazi kaFaro yathi kuye, “Mthathe lumntwana ungondlele yena, ngizakupha isondlo.” Ngakho owesifazana wamthatha umntwana wamondla.

10 Esekhulile umntwana, wamthatha wamusa endodakazini kaFaro wasesiba ngumntanayo. Yasimutha ibizo yathi nguMosi ngoba yathi, “Ngamkhupha emanzini.”

UMosi ubalekela eMidiyani

11 Ngelinye ilanga, uMosi esekhulile, waya lapho okwakusebenzela khona abantu bakibo, wabona ukuthi babethwele nzima kanjani. Wabona umGibhithe etshaya umHebheru, omunye wabantu bakibo.

12 Wathi thala ngapha langaphaya wabona kungelamuntu, wasebulala umGibhithe wamfihla etshebetshebeni. 13 Ngelanga elilandelayo waphuma njalo wabona amaHebheru amabili esilwa. Wasebuza lo owayephambanisile wathi, “Kungani utshaya owakini ongumHebheru?”

14 Indoda leyo yathi, “Ngubani osewakwenza waba ngumbusi lomahluleli wethu? Usucabanga ukungibulala na njengoba ubulele umGibhithe?” Ngalokho uMosi wesaba wacabanga esithi, “Engxenye lokhu engikwenzileyo sekusazakala.”

15 Kwathi uFaro ekuzwa lokho, wazama ukubulala uMosi, kodwa uMosi wabalekela eMidiyani, lapho afika khona wahlala phansi eduze komthombo. 16 Umphristi waseMidiyani wayelamadodakazi ayisikhombisa, afika ezokukha amanzi lokukhelela imikolo ukuze anathise izimvu zikayise. 17 Kwafika abelusi abathile babaxotsha, kodwa uMosi wasukuma wabalamulela wanathisa izimvu zabo.

18 Kwathi izintombi sezibuyele kuyise eRewuli wazibuza esithi, “Kungani lamhla liphangisile ukuphenduka?”

19 Zaphendula zathi, “KulomGibhithe osilamulele kubelusi. Uze wasikhelela amanzi wanathisa izimvu zethu.”

20 Wawabuza amadodakazi akhe wathi, “Ungaphi? Limtshiyeleni? Mbizeni ukuze azothola okokudla.”

21 UMosi wavuma ukuzahlala lale indoda, eyamnika indodakazi yayo uZiphora ukuthi abe ngumkakhe.

22 UZiphora wazala indodana, uMosi wayitha ibizo wathi nguGeshomi, ngoba esithi, “Sengibe ngumuntu wezizweni endaweni yabezizweni.”

23 Ngemuva kwesikhathi eside, inkosi yaseGibhithe yafa. Abako-Israyeli bakhala babubula ebugqilini babo, kwathi ukukhala kwabo becela usizo ngenxa yobugqili ababekubo kwafinyelela kuNkulunkulu.

24 UNkulunkulu wakuzwa ukububula kwabo wasekhumbula isivumelwano asenza lo-Abhrahama, lo-Isaka loJakhobe.

25 Ngakho uNkulunkulu wakhangela abako-Israyeli, wakhathazeka ngabo.